Deheime vomene Trip zom New Star Tournament.
Am Fritig Morge hemmer Winifred verloh metem Schuelbus ond 18 motivierte Spelerinne. Ond parat för 2.5h Fahrt. Er mönd wösse do send ned alli Strosse asphaltiert auso cha mer sech ame au ofne rockligi Fahrt istelle.
Es esch ame rächt gmüetlech, well alli eri Dechene ond Chössis metnähmed ond mer Musig losed.
Ond plötzlech e mega Chlapf! Ech ha gmeint d Chüelbox esch abegheit! Aber nei es esch ergendöbbis am Bus gseh..
De hemmer mösse em Schnäggetempo zonere Wärkstatt fahre ond dete warte. Auso das Beld vom Fenschter e der Werkstatt seid doch scho aues..
De hemmer dete mösse es Zitli warte, bes si de Schade behobe hend ond mer de schliesslech hend witer chönne fahre bes zo de Tornhalle.
Do send es paar Belder vo de Busfahrt! D Mina hed de Bodil, de Taya ond mer mega kuuli Frisure gmacht. Wie mer au schön of dem Föteli cha erkönne hed sis zemli em Greff!
E de Tornhaue acho hemmer de s zitli mösse warte bes mer dracho send. Meine Güte ben ech nervös gseh vorem erschte Speli. Mer send es JV-Team was di schwächer Kategorie esch, hend aber glich gäge di stärchere Teams mösse aträte. Es hed mega vell Spass gmacht, entlech weder mou z spele. Ond mer glaubs gar ned, aber ech be e de Hauptufstellig. Ech ha alli Speli döregspelt. Mis Höch esch volkomme gseh als ech en starchi Gägspelerin ha chönne blocke! Das esch es guets Gfühl gsi.
Mer hend s erste Speli gwonne ond die räschtleche emmer knapp verlore, aber mer hend wörkli guet gspelt. Ech be stouz of euses Team. Leider chani ned met Belder diene, well d Mina gmacht hed ond ech die zo dem Zitponkt leider nonig han. Aber vellecht es anders mou.
Ah no zom säge esch das es 2-tages Turnier gseh ond mer send zo de Grossmuetter vonere Spellerin go öbernachte. Zom Znacht hemmer 5 riese Pizzene gmacht ond dezue Schoggimelch tronke.
Was mega loschtig gse esch: D Bodil ond ech send e de Schlofsäck chopfderab d Stäge derab grötscht. Die andere hend eus versecheret, dass seg mega loschtig. Es esch wörkli super, nor chli beängschtigend wells Gfühl hesch du chonsch nömme us am Ändi...
2.Turniertag
Do hemmer nome am Morge zwöi Speli gha ond nochhere semmer be eusem besser Team de legscht Match go luege. Nochhere hemmer ufem Wäg em Walmart aghalte ond hend dete chli Zit gha zom Züg poschte. Do beni rächt öberforderet gseh, wells eifach so vell Züg geht woni gärn wörd chaufe, aber d Zit hed eus zomene chorze Shopping Trip zwonge.
Gässe hemmer em SUBWAY Sandwiches. Die send mega guet! Chasch der aues säuber zämmestelle ond uswähle. Aschliessend no Frozenyogurt go chaufe ond ab e Bus 2.5h heifahre.
Mer hend ei riese Fun gha bem heifahre. Ech ha neui felzsteflis kauft ond de semmer uf die "brilliant" Idee cho eus Sache of d Körper z mole ond Onderschrefte z gä. Es esch of jede Fau nie längwilig em Bus. Entweder lose mer Musig oder mer redet...
Loged doch mou wie das guet usgsehd. Schoggi Frozen Yogurt met Cockie Dough ond Oreo..
Keine Kommentare:
Kommentar veröffentlichen