American Style

Mer haute emmer nochem Training amene Shop a das alli chli chönd go züg poschte..

Esch mega super mossi säge. Ond höt hani au chli Züg kauft onder anderem so es Oreo Teil, wöu ech weiss das mini Schwöschter das mega gärn hed, de hani grad denkt probiere mer doch mou gell... Ond jo Vanessa ech has no zemlech gärn! 

Do en Winifred hani glehrt wie mer rechtig es Trainings Tischi dot zrächtschnide. Ärmel wäg!! Aber moss säge es esch tusssig mol agnähmer zom trainiere.. So loftig..! Etz hani eifach ke Ärmel Tischis meh zom spörtle, well ech alli zrächtgschnette ha :)

GO WINIFRED STYLE!

School can be hard

Ech legge vou kabott em Bett nochemene enorm asträngende Tag!!
Grad noch de Schuel hemmer Training en Roy gha. Das mer emmer 1Mile seckled beni mer jo langsam scho gwöhnt, aber was mer höt hend mösse mache. Do chas eim jo ned guet go..
Mer hend mösse s halbe Volleyball Fäud hin und här seckle ond das eifach 17 mol met Linie berühre. Mer send zwe groppene gseh ond emmer abwechsligswis dracho. Das ganze Speli hemmer em ganze 13-mou gmacht. Be met mine Chräft am Ändi gsi... Mine chopf hed d farb gha vonere Tomate :) Ond dezue hend natürli grad no mösse alli Jungs vom Football zueluege, jo danke vell mou.
Ond de chömme mer erscht am 8ii hei ond de setti no e Bärg Husi erledige woni gradgar  ned cha bruche grad..

Etz bruchi en ordendlechi Portion Schlof. Söscht magi morn ned ed Schuel go.. Ech freu mech ofs Wochenänd, well am Fritig gömmer anes Turnier öbernachtete dete ond am Samschtig esch weder es Turnier. Sonntig ond Mäntig esch ergend en FUN-DAY. Das heisst för mech Fritig ond Mäntig kei Schuel! Das nenn ech de mou e gueti Sach!

Floating

Höt Morge hani no gmeint es werd e normale Sonntig zom omefuulänze ond chli chönne z skype. Aber falsch dänkt Steffi! As ech mine Laptop gstartet ha ond es Facebook be zom mini Nochrechte checke hani gseh, dass mer zwöi vo minere Schuel gschrebe hend ond mech iglade hend metzcho go met Reife ofem Floss z triebe. Das hani dete aber nonig gwösst, well echs gar ned verstande ha. Das send äbbe no Sprochproblem. hihi
D Mina ond ech hend de eifach uf di 10 abgmacht bem Jorden. Dete send eus no Zmorge Burritos met Ei serviert worde. Noch dem semmer de Rechtig Floss gfahre, aber das ned normal.. Nei mer hende of de Ladeflächi es Sofa gha (guet agmacht glaubed mer) ond dete semmer de di ganz Fahrt ghocket. Betzli chribligs Gfühl esch das schono gseh, aber mega loschtig.

Womer de bener Ranch acho send nochhere hauprige Fahrt. Hani de schnell gschnallet wieso mer alli e Gommi reng selled go nä. Mer gönd met dene e Floss! Mega kuul.. 

De hemmer alli no öbbis z Trenke gschnappet ond ab e Floss. S Wasser esch zwar wörkli iischaut gsi, aber met de Zit hesch das au nömme gspört. Amene Ort hemmer de gstoppet ond de heds au scho agfange met de Schlammschlacht. Ech wott au jetzt ned wösse us was dä Schlamm gsi esch. Of jede Fall semmer vo obe bes onde alli vou gseh. Ech glaube e mim Ohr esch bes etz no Dräck! Leider hani defo kei Belder, well e kamera e floss nä ned wörklech gschid gsi wär. Noch knapp 2h semmer weder usegstege ond hend e e Lunch zo eus gno. HOTDOG TIME! Womer au dete alles ufgässe hend. Semmer zrog zom huus vom Luke ond send dete nochli omeghängt. Siehe Fotos unten:

Es Büsi vom Luke. Er hed mega vell gha.. Alli mega süessi!

D Mina ond Ech am ergendenere komische Glacé schlörfe..

Womer ener Istrueh gfonde hend.

Ech meine do esches normal das mer of sis Auto hockt ond dezue nochli gueti Musig lost! :)

Das wisse Auto do droffe esch e ehm Rächts osse. Sin Name esch Tucker. Kuule Cheib!

De Absoluti Kult Food! Sonnebluemechärne ässed do wörklech alli. S mühsame a denne esch eifach das du si us de Schale mosch brenge ond das esch harti Arbet för Nichkönner wie mech. D Amis nämed e Hampfle es Muu ond hend ergend en Technik das si de Chärn usegrenged ond de räscht eifach a Bode spöitzed. Bes Ändi Ustuschjohr chani das! :)

Belt Tournament

Höt semmer en Belt gseh amene Volley-Tournament. Deför semmer am 6.00 am Morge abgfahre. Mega kuul fendi das mer en mannschafts bus hend ond emmer chönd eusi Dechi onds Chössi drinnine nä ond de chli pfüüsele. Höt hend d Ami Girls de Bodil ond mer chli zeigt was si so ässed. Em Foti onde esch es Bispel. Sie hend Cheddar Chäs enere Spray Dose ond dönd das ud Crackers, Chips ond witeri Sache. Ech aus ächti Schwizerin ha ehne gseid, dass das doch ke rechtige Chäs sig ond de hemmer mösse lache. :) Aber chönd mer glaube es esch wörkli ned emou so schlecht. Was si au debi gha hend esch es ganzes Glas Peanut Butter ond ässed metemene Mässer grad drususe. Die ässed eifach mega ongsond, aber stört mi eigendlech ned. Sonneblueme Chärne hemmer au no probier. Das esch fein, aber rächt härti Arbet die em Muu z öffne ond usezbrenge. Ond de hesch nome so es chlises Chärnli. Aber es brucht Technik. Säged au di andere ;) 

Höt hed nome s bessere Team gspelt, ond mer send chli d Handlanger gseh hend ehne Sache gholt oder   Blätter usgföllt wär wievell Service,Block,Ahnahme verhaue hed oder guet gmacht hed. Die nämmeds do zemlech gnau met so Sache. Ond jedes einzelne Speli esch no gfelmet worde! Be de Heifahrt hemmer de no e chorze Stop bem McDonalds gmacht ond alli hend chönne chli öbbis ässe bevor d Fahrt witer gange esch.

D Fahrt selber esch rächt loschtig gse. Ech verstoh mi guet met dene Mädels. Sie hend eus chli vom Homecoming Ball ond em Prom verzellt ond das esch zemli spannen gsi. Ech freu mech scho etz, wenn ech cha es kuuls Chleid allegge ond parat mache deför! 

Emily ond Ech

S team met em geile Dress!

Do de erwähnti Chäs us de Tube ond näbedra Taccos. Mis Zmettagässe

Second School day

2. Schueltag vorbei!
Ged eigendlech ned vell z schriebe. D Schuel hed eigendlech scho chli öbbis wie us de Felme. So met de Sporthalle, de Schliessfächer, de Schuelbüs ond das si mega Sportbegeischteret send.
Aber uf de andere Site eschs au ganz anderscht. Aber d Schuel gfaut mer of jede Fall, sie esch mer rechtig sympatisch.
D Schliessfächer send of jede Fau e rechtig gueti Sach, denn mer hend so vell decki Bücher. Die chasch gar ned alli met eim omeschleppe ond da mer a manche Tag grad aschliessend ad Schuel Training hend mömmer au alli Sportchleider debi ha.
Wie mer de ofem Beld cha erkenne esch mis Schliessfach bomsvolle.

Eigendlech hemmer dör de velli Sport gar ke Zit zom ergendwi Husi mache oder mou eifach nüd mache. Mer send höt am 7 erscht heicho de sett mer no ässe, dusche ond de einisch mou no lere. Esch eifach grad chli vell uf einisch das alles guet onder ei Huet zbrenge. Be aber scho froh, wenni wenigschtens aktiv be! Aber be mer secher, dassi noch de Volleyball Saison secher ned Basketball werd nä. Ech wott mis Ustuschjohr jo schliesslech ned nome em Sport wetme. Ond vellecht chani eifach so metem Team metgo ond Föteli, Felm ond so sache mache. Mis Gaschtmami hed mi of die Idee brocht ond ech fend sie eigendlech no rächt guet. besch glich ergendwie debi, mosch aber ned go hert trainiere. Dönt nochemene perfekte Job för d Steffi. So weni be möglechscht wenig Ufwand ond glich es guets Resultat. :) DANKE öbrigens a alli wo do emmer mine Blog gönd go läse, fenid mega toll.

First School Day!

Höt hani mine erschti Schueltag gha!!!
Höt morge beni ganz schön ufgregt gsi mossi säge. Be Zecher 5mou ofs Wc gange bevor i de entlech abgloufe ben.
De eschs eigendlech aues rächt guet gange. Ond mer hend eusi Fächer gwählt:

1. Periode - Englisch

2. Periode - US History

3. Periode - Biology

4. Periode - Clothing (Chleider mache)

5. Periode - Algebra

6. Periode - Consumer Math

7. Periode - DTP / Digi Tech (Design am Pc)

S ässe am mettag esch eigendlech au ned wörkli übel. D regle esch eifach för alli Highschool Schüeler mendeschtens 1 Frocht ond Salot no ofem Täller hed. Ond Cookies heds au no gä as Dessert. Dönt eigendlech ned schlecht gäu? :)

S einizige was mi wörkli stört esch, dass mer nome 25 Minute zit hend zom Ässe. Ond nochhere gods weder met de Schuel witer. Ond noch de Schuel hemmer no 2h Training. Auso eis omeghätzt vom einte zom andere Termin.

So blibt mer wenigschtens aktiv ond cha gar ned a deheime dänke oder heiweh ha. Jede Tag gfauts mer weder chli me!!!

Ah jo mer hend nome 3 Seniors a eusere Schuel.. hahaha

Das heisst das Johr esch eigendlech scho gesetzt wär de Ballköni werd. Well er esch de einizg Ma e dere Stufe. D Schuel esch ebe scho mega chli. S machts aber mega familiär. 

Mis Dessert höt nochem Znacht:

Schuelbus vo eusere Schuel:

Vergässe z metteile, dass ech vo eim scho en Spetzname becho han ond zwar:

SPARKLE

Ond dä name, well ech es Zahnsteinli ha ond ech glaube das faszinier zemlech vell done.

Mannschafts Belder

Höt eschs Volley Team ond s Football Team zämme go Föteli mache. Eifach alli Outlaws zämme.
Dezue semmer metem Schuelbus es Gebiet gfahre wos brännt hed.
Mer alli met wisse Dress zmetzt zwösche de vercholete abrönnte Bäum ond schwarzem Bode die Föteli gmacht. Ech denke sie send de hammer. Rächt geile Ort zom go Föteli mache. :)
Nor blöd, dass mer eifach alli rabeschwarzi Händ gha hend vom feschthebe a de Bäum wo schwarz gsi send.
Wenn ech de die Belder ha de stelli si grad inne. Wie er dete de wärded feschtstelle gsed mer sofohrt wär en Ustuschschüeler esch ond wär ned. Wieso?
Jo mer hend alli ängi Hose a ond Sportlecheri Schueh ond kei Frau vo ehne hed ängi Hose ond alli hend so Cowboy Steffle a.
Ond was au ganz loschtig esch en Winifred. Eigendlech praktisch alli send ergendwie verwandt metenander.

Aschliessend as Föteli mache hemmer 2h Training gha.
Nöchscht Wochenändi esch nämlech scho s erschte Tournament.
Ech spelle em weniger guete Team was mi absolut ned stört. Mer gods hauptsächlech ome Fun ond trainiere dömmer schliesslech glich alli zämme.

Ond morn esch mine erschti Schuelatg. Meine Güte ben ech ufgregt.
Brechte de grad vo mine neue Erläbnis.

1. Föteli zeigt mis Dress för die Saison
2. Föteli Gym
3. Föteli eusi Chatz metem Name Montana
4. Föteli entstande emene chline Fotoshoting höt met de Bodi
5. Föteli mine Gaschtvater luegt emmer das of dere Tafle di neuschte News chöme ond höt semmer alli sächs dete erschene ond so welkomme gheisse worde. Hemmer mega süess gfonde.

Fun

Do hani no es zueträffends Beld gfonde!
Ah ond au e gueti Sach en Montana esch: Mer hend ke Taxe do!

Weekend in Billings and Exchange Student Party

Chome nochemene lange Wochenänd glich mou dezue mini Erläbniss met euch z teile.
Ech be öbers Wochenändi of Billings gange, wo d Eltere vo mim Gaschtmami wohned. Am Fritig hemmer eus of d Socke gmacht grad noch mim Training. De Roy (Gaschtvater) esch ned met eus of Billings cho, är esch go goufe met sim Papi. Mer hend auso es Mädels Wochenänd vor eus gha.
Leider hani do dezue kei Belder, well ech d Kamera vergässe ha.
Fritig:
Mer send zonere Art Chöubi gange ond det Bahne gfahre.
A dem Tag eschs mer ned so mega guet gange ond de beni eigendlech ned wörkli so be de Sach gsi.
Aber es esch glich e gueti Ablänkig gseh ond ha no die Äuter Gaschtschwöschter könnelgehrt.
Schöni Details vo dem Tag: D Paige die grösser vo dene bedne hed mer gseid, ech seg etz eri Schwöschter för emmer :), dass hani echt mega süess gfonde. Ond au d Grossäutere hani grad es Härz gschlosse!
Samschtig:
Am Morge stohd vorem Hus vo de Grosseltere eifach en wöude chline jonge Fochs. Das esch de mou süess gsi.
Endlech mer hend chönne go shoppe! E de Mall en Billings eschs wörkli guet zom ichaufe gseh. Victoria Secret, Abercrombie & Fitch..
De ganz Tag beni vou beschäftigt gseh ond well ech haut d Sproch ned so mega guet verstoh emmer merki de erscht vor Ort was det genau abgod.
Ech ha a de Tag so vell verschednigi Lüt us de Familie vo minere Gascht Muetter könneglehert ond er glaubed ned wie verwerrend das esch. Sie hed e grossi Familie, aber aui mega nätt.
De Cousin vo ere hed de Eagle Scout gmacht ond deför es Fäscht gha. Ere Cousin esch jönger als ech! Vou verwerrend :)
Ond mer hend eifach ehm ghoufe alles vorzbereite för sis Fäscht.
Ech ha eigendlech bes etz no ke Blasse Schemmer för was die Uszeichnig genau esch. Aber alli send mega Stouz of ehn gseh.
Während dere Zeremonie esch de di ganz Familie vöregstande ond mech hends eifach metzoge. Är hed de so e Rondgang gmacht ond alli omarmt, wo er be mer acho esch escher mega verwerrt gseh ond ech ha eifach mösse uselache, well er mech jo gar ned könnt. Jo das hani loschtig gfonde.
Wo de das fertig gseh esch semmer zo de Grossäutere s zwöite mol go öbernachte.
Sonntig:
Chele esch agseid. Ech be nonie so gern ed Chele gange wie done.
Näbem Hauptruum met de Bühni ond de Linwand esch e Cafeteria wo der vorhere chasch en Kaffi go hole.
Zerscht mol hemmer knapp e haub Stond metemene guete Sänger Lieder öbere Gott gsonde wo aber wörkli popig gsonge send gsonge. Ond nochhere hends mega vell met Linwand ond Powerpoint gschaffed.
Es esch wörkli berührend gsi wo sie öber onvorhersehbare Chrankheite gredt hend ond das alles e grond hed ond de Gott eim ghöri brüelle..
De hends no es Felmli abglo vomene Baby wo nome 3 Mönet of de Erde gseh esch ond de weder hed mösse go, wells chrank gsi esch. Das esch de mou berührend gsi. Hani fascht mösse brüele.

Am Obe hemmer s Ustuschschüeler Fäschtli gha met aune 6.
För aui wos noni wössed. Mer send us: Norwege, 2 Denemark, Finnland, Schwede ond ech us de Schwiz.
Aui hend eri Gaschtfamilie metbrocht ond de hemmer es BBQ gha ond anschliessend hemmer es Speli gmacht. Jede Ustuschschüeler hed es Brett becho ond je öbber vo de Familie ond de send eus froge gstell worde wie: Was wördsch du mache, wenn du en Woche ellei deheime wärsch ond denne de Hond stärbe wörd. A) Beerdige B) E Chüelschrank tue bes d Gaschtfamilie heichond oder C) E Gösu rüehre.
Ond de hed mer sini Antwort ufs Brett gschrebe ond s Familiemetgled ebbeso, ond wenn mers öberistemmende Resutat gha hed, hed mer Pönkt för das becho.
Bem Alter vo mine Gaschteltere hani aber so rechtig es WC glänged.
Mine Gaschtvater hed mi schön ufzpge im Nochhinein. D Frog esch gseh, schrieb s Auter vo dine Gaschteltere uf. Ond ech ha ke Ahnig gha ond gschrebe: Roy: 48 ond Lori: 36
Blöd nome das er eigendlech 10 johr jönger esch ond sie ebbefaus 3 Johr jönger.
Ech be di einzig gseh wo so rechtig denäbe greffe hed.
Es esch wörkli es rächt loschtigs Speli gseh. Ond so eschs e allem e mega loschtige Obe gseh.
Scho e wenige täg hani mine erscht Schultag!
Ech be scho etz gspannt druf..
So etz mossi aber schnellstens es Bett. Möcheds guet mini Liebe..
Ond danke förs läse

D Bodil ond em Hendergrond no di andere 3 Ustuschschüeler.
Do semmer grad am Speli spele gseh.

Mina ond ech

 

Ustuschschüeler Herre Abteilig

Jorden's Birthday

Eigendlech setti scho schlofe, welli morn weder gli ufmoss aber ech ha denkt es chönnt euch no intressiere wasi höt so trebe han.
Am Morge wie emmer 3h Training. Ond ned eifach mou chli trainiere, zerscht mou 1Mile go seckle ond vou dra. Aus hätt ech gueti Usdur nach 4 Mönet ke Sport me.
Aber jo guet do mossi etz döre, wenn i chli Lüt wott könnelehre ond mine Lieblingssport spele.

Nochhere hemmer no mösse en Konzentrationstescht am Pc go löse.
Plus Gsondheitsfrogene zo eim selber beantworte. Typisch Amerika eifach zemlech öbertrebe. :)

Mine Nommitag esch eigenlech ned wörklech ufregend gseh, denn ech be so kabott gseh vom Training, dass i es Bett gläge ben ond chli dööset han.
Aber de hemmer es feins Znacht gno am Obe ond d Boudil en anderi Ustuschschüelerin vo Denemark esch verbi cho ond mer send chli abhängt zämme ond hend gredt. Das esch wörkli e gueti Onterhaltig gsi.

Höt hed de Jorden DeHaven Gebori gha ond mer send iglade gseh zom verbi z go. Aber vorhäre hemmer en Golfkart Tour dör Winifred gmacht z Zwöite ond e riese cheibe Freud dra gha.
Siehe Fotos:

Nochhere semmer de au no zuegstosse zo dem Feschtli. Es send mega wenig Fraue gseh, aber es esch glich kuul gsi weder neui Lüt könnezlehre ond eifach Ablänkig zha. Jede Tag werds weder chli besser au met de Sproch ond ech werd mer au emmer secherer, dass es es mega genials Johr werd wärde.... :)

Die zwe Belder send am Fäscht entstande. De Jorden hed es rots Muul, well er de Chopf e di ganz Torte dröckt hed. :)

Bozeman

gugusal do beni weder.
Grad leggi schön em kuschlige Bettli ond kuschle metem Teddybär vo de Lorena Heini.
Domet wott ech ere nomou mega danke, well ech ha dä Bär mega gärn ha ond er mech a deheime ereneret. :)

Settem Mäntig hani jede Morge am 7.30 för 3h Volleyball Training. Ond das die ganz Woche ond de no Mäntig Zischtig, well d Schuel erscht am Mettwoch afod.
Er glaubed gar ned wie sträng das Training do esch hengäge zo dem diheime.
Ech cha chum me laufe, well mini Moskle mer so weh möched. Aber glich mossi jede Tag witer mache, well ech em Team wott blibe.
Nichts zu trotz beni wörkli froh speli Volleyball, well so lert mer schneller Lüüt könne ond es esch jo au no min Lieblingssport.

Die wennd natürlech guet si a dene Speli ond am beschte Meischter em Staat wärde. Mou luege öbs mer glengt e de besser Mannschaft chönne z spele.
Gebe mer of jede fall müeh.

Geschter hani no mösse zom Arzt go, well mini Onterlage vom STS ned gange send als Gsondheitcheck. Bem erschte Doktor hemmer erfahre, dass dä usgrüeft worde esch för en Notfall ond hend mösse no witer fahre of Great Falls. Bes mer de entlech dä Zättu gha hend, dass ech daf Volley spele hed em gsammte 6h duret. Ha eifach die ganz zit gmüetlech em Truck vom Gaschtvater gschlofe während de lange Fahrt.

Am nöchschte Wochenänd gömmer of Billings. Die gröscht Stadt em ganze Staat go d Grossältere bsueche ond Aktivitäte mache. Ech freu mech wörkli mega druf.
Ech daf en Kollegin metnäh, aber bes etz hani no niemer. Etz chlämmi mer eifach en Arsch ond froge morn morge währendem Training d Sammy. Sie esch en liebi ond vellecht hed si jo loscht. Mer weiss jo nie.
Ech werd euch of jede Falls noch dem Trip weder brechte was det genau abgange esch.



Ah jo legschtmou hani jo gseid, dass mer rechtig Yellowstone gönd. Mer send of Bozeman gange ond hend dete d Softball Spelis vom Gaschtvater agluegt. Sie hend om die Sieg em Staat gspelt. Ond das esch 2 Tägig gsi. Enes Museum semmer au no gange ond hend det so Dinosaurier Artefakt ond so agluegt. S esch no easy gseh.

Gwonne hends de ned. Ond er esch nochhere trurig gsi.
S erschte Hotel hemmer de weder gwächslet wells es Bett z wenig gha hed ond aues so nöch ufenand. Drufabe semmer es Best Western ond das esch de besser gsi.

Erschti erkondigs Tour

Hallo Miteinander
Be eus esch grad haubi 11 am Obe ond ech ha euch vell z verzelle.
Höt morge hani zerscht mou e riese Skype Marathon gstartet. Ha met de Grosseltere, em Frönd ond de Eltere chli skyped. Be mega öberforderet gseh zom s ganze izrechte well alli zor gliche zit aglüte hend.
Aber schlossendli hani met allne chönne mendeschtens e haubstond rede ond es esch mega schön gsi weder mou si z gseh.
Chli spöter noch dem hed mini Gaschtmuetter mer vorgschlage e Fröndin vo ere z bsueche wo au en Ustuschschüeler hed. Natürli hani ned chönne ablehne, well i mega gspannt gseh be wär dä Ustuschschüeler esch.
Er chond vo Denemark ond esch scho sett paar Täg do.
Dezue gstosse esch au no d Mina vo Norwege. Mer hend chli Fernseh gluegt, gässe ond eifach chli gredt metenand. Plötzli chömmed di Erwachsene weder hei ond es heisst es seg Füühr e de nöchi ond mer selled doch metcho.
Mega schnell eschs gange ond de hocke mer scho emene Auto ond fahred det he.
Schlossendlech hemmer emene Huus vonere Grossmuetter mehreri Stond gwartet bes sie zrog cho send vom Füühr stoppe. Ech weiss gar ned öbs scho glöscht esch. Aber es esch no rächt gross gsi.
Mer hend eifach de ganz Nommitag chli Fernseh gluegt. :)

Eigendlech hend mer vor gha zonere Party z go höt Obe, aber mini Gaschteltere hends ned för klug ghalte. Was ech natürli absolut verstoh.
Am 6:00pm hend mer es Meeting gha för die wo wend Volleyball spele. Det hemmer hani weder es paar Mäitschis chorz könnelglehrt. Aber so wie ech das gseh ha schined die wörkli aui nett z si ond ech freu mech scho etz of d nöchscht Woche wenns Volleytraining afod.

Ah ond höt hend mini Gaschteltere chorz schnell entschlosse das mer morn rechtig Yellowstone gönd ond det e Nacht öbernachtet.
Das nenn ech de mou rächt spontan!


De mäud ech mech mol ab bes am Sonntig Obe ond vell Spass e de Schwiz!

Few days here

Etz leggi grad metem Laptop ofem Schoss of mim rächt easy bequeme Bett ond schriebe weder en chline Bitrag för euch.
Geschter beni acho en Great Falls emene mega chline Flüger wo mis Handgepäck eigendlech vell z gross gseh esch ond echs ha mösse onder de Vordersetz quetsche.
Noch kanpp 2h Flog beni de glandet ond be vo 8 Persone empfange worde. Meine Güte völlig öberforderet. Alli Chend, de Grossvater, e Kollegin vo de Familie ond d Gaschteltere. Bem hoi säge natürli vou ned gwösst ned wie reagiere. De hani eifach d Fraue omarmt ond d Manne metemene Handschöttu begrüesst.
De send de di and ere mou gange wo ned be mer wohned ond mer hend no ofe Koffer gwartete. So komisch vou ned gwösst was rede ond de esch so stell gsi.
Be mega hongrig gseh ond de semmer e Applebeas go e Burger ässe ond Erdbeeri Saft trenke. Dä Saft esch mega fein gsi. Noch dem hemmer öbbe 2- 2.30h gha bes mer die ganz Wüeschti öberwonde hend ond en Winifred acho send.
Dete hani rächt e Kulturschock erläbt. Er glaubet gar ned was das för es Kaff esch. :)
Mine Gaschtvater hed mer natürli grad schnell d Schuel zeigt, well er jo e minere Schuel de Rektor esch. S erschte was ech gseh ha wo ech inne cho be esch d Tornhalle gseh zmetzt enne em normale Gebäude. Das hed mi grad chli erstuhnt ond rond herom send eifach Klassezemmer. Wo er mer gseid hed das do 76 schüeler ed Schuel gönd zwösche 7-18!
Aber wenni so öberlegge esch es mega kuulo, well so chani vell besser Frönde fende ond au vell nöcher könnelere.

Almost there

So etz hocki au scho am Floghafe z Denver ond warte of min aschliessend Flog noch Great Falls. No wenigi Stond ond de treffi s erschte mou of mini Gaschtfamilie. Mer cha gar ned säge wie gmeschti Gfühl e mer enne send.

Geschter hemmer eus em Camp met de Groppene wo mer afangs woche iteilt worde send of die gross Show vorbereitet ond no Zit gha zom packe.

Zor erklärig dör die ganz Woche hemmer en STS Olympics döregführt met verschedne Sportarte wo mer gägenand aträte send. Cheerleadin, American Football, Baseball, Sinkron Schwemme ond no en Schatzsuechi. Jedi Disziplin hed verschednigi Pönkt gä zom hole ond mer hed chönne Pönkt verlüre wemmer e de Groppe sini eiged Sproch gredt hed. Zom die Woche abzschliesse hed jedi Groppe sech en Show öberleid wo am beschte zo erem Teamname passt. Euse Name „Future Hippos“ Mer hend eifach en Komedie dröber gmacht, dass mer en Amerika mega fett werd.

E einere Szene esch s erschte Znachtässe met de Gaschteltere dargstellt worde. Ond de Ustuschschüeler wott ombedengt ned fett wärde drom esst er ned vell, aber all Minute lütets a de Töre metere neue Bstellig. De Ustuschüeler mag eifach nömme ond de chömmed d Sänger es spell ond senged s Lied „Eat it, just eat it“ abgleitet vom Michael Jacksons Song.

Jo es esch rächt e loschtigi Aglägeheit gsi. Gwonne hemmer de aber glich ned.

Aschliessend hed no e Party gstatt gfonde met emene DJ.

Be wörkli mega trurig gseh, dass die Woche weder verbi gseh esch.

Mer hed sech afo iläbe ond hed neui Kollege gfonde ond de werd mer weder so usemene Öbergangsnäscht usegresse. Wobi mer de no sis normale Deheime vermesst eschs ned wörkli eifach för mech.

Met einere Schwizerin hani mi wörkli bsonders guet verstande. Em erschte Text hani si schomou erwähnt. Sie chond vo Bern ond chond es Johr nach Utah zo Mormone.

Es esch schön z wösse das ech au emmer met ere chönnti Skype, wenn i weder mou emene tüfe Loch wörd setze ond ech mech ned ellei usezieh chönnti.

Zom Glöck hani etz scho öber d Hälfti vo minere Reis döre ond cha mi etz de uf d Familie freue. Onglaublech wie gspannt ond ufgregt ech of die ganz Omgäbig det änne ben.

Wenni höt Obe no es Internet cha werdi mini erschte Idröck euch allne no metteile.

Ech schriebe dä Text ebbe momentan em Word vor, well ech so förig Zit ha ond e Ablänkig bruche. Ond wöui ke Internet ha mossis haut eso mache ond stells de am Obe inne.

NEW YORK CITY

Liebi Frönde, Verwante, Familie ond Intressierti

For knapp emene Johr ha ech mech för es Ustuschjohr e de USA entschede.

Ond etz beni au scho däne. Zwar noni grad be de Familie aber em Camp. Ech ha denkt do cha ech au mini Erläbnis, Gedanke, Schocks (eventuel) met euch allne teile, wenn er loscht hend z läse.

Wahrschindli schriebi zemlechi details öber mis Wohlbefende. Auso ned schockiert si wenn ech au öber schlechti Sache schriebe am Afang. ;)

Mini Reis hed begonne metemene träneriche Absched vo deheime. 

Woni dör d Gepäckkontroll be, wo mer no s Gaschtgschänk för mi Gaschtvater abhande cho esch (Sackmässer), hani mi zemlech ellei gfühlt ond ned gwösst; Was mach ech do eigendlech. Wieso verlo ech mini geliebt Familie ond de aller bescht Frönd?

Dör das Camp hani mer eifach e Chopf gruefe wieso ech das mache ond das es e riesige Chance esch för mech. Ech bedanke mech demet härzlechscht be mine Eltere, dass si so vell Vertraue e mech stecke das ech das schaffe werd. Danke vöu mou Mami ond Papi!

Ech weiss au das ech das cha schaffe, aber nor dank de höuf vo ehne.

Die erschte 2-3 Täg send zemlech de Horror gseh för mech. Ech ha so Heiweh gha ond alles vermesst. De heds nor es Wort brucht ond es send mer Träne cho. 

Zom Glöck hani do no Lüt debi gha wo di glich Sproch gredt hend ond met dene ech ha chönne guet dröber rede. Ha au wörkli gueti Lüt e dere Zit könneglehrt.

Eini defo esch d Noemi vo Bern. Met ere hanis mega loschtig ond mer chönd guet öbber eusi Problemlis rede. Be wörkli mega froh, dass ech e dere erschte härte Zit no öber ha wo met mer fühle cha.

Chli weniger als 2 Täg ond ech werde zo de Gaschtfamilie flüge.

Ech be mega nervös scho etz! Hoffentlech klappt alles ond ech läbe mech so schnell das es god i.

Prep. Camp in NY

Monday, 6.8.2012

Mer hend mösse am 7 am morge atrabe zom Zmorge, dass mer gnueg Zit hend zom eus nochhere parat mache för d Stadt. S Zmorge esch wie emmer ned mega de brüller gseh. Wenn mer Glöck hend hemmer es paar Fröcht, Rühreier ond e guete Saft. 

Noch dem guete ond au rächt mageföllende Zmorge semmer agfüehrt vo de Leader rechtig Train-Station gloffe.

Em Zog enne hemmer de mösse stoh för e haub Stond bes mer de entlech acho send am legendäre Time Square.

Zerscht hemmer 1h Freizit gha zom chli omeschländere ond betzli ichaufe. Natürli sem mer grad abdüset zom Forever21 ond hed wörkli rächt zuegschlage.

S Zmettag ässe hemmer em Hard Rock Cafe gno!

Alli 40 Ustuschschüeler hend a jeweils 4-er Tesch platz gno ond e guete Mettag gnosse.

Noch enere stärchig met vell Fastfood semer zo de 5th Avenue ufegloffe ond send dete knapp 4h omegschländeret ond e grossichauf tätiget.

Leider hani au dä Tag ned ganz ohni Heiweh öberstande. Nor scho das Gfühl z ha ned z wösse was of eim zuechond ond mer heds gfühl mer esch voukomme ellei macht mer so Angscht.

Ech probieres z onderdröcke aber mängisch chonds eifach vonelleige ond mer cha nüd degäge mache.

So etz hani mou es betzli öbbis gschrebe. 

Natürli werd nomeh folge ond ech wörd mech mega freue, wenn er mer metteiled öbs euch gfallt.