Trip to Paradise

Awards Banquet and Graduation

Es esch di legschti Woche för eusi äutischte e de Schuel gseh. Sie send mega e stress cho, well si no so vell hend mösse erledige. Jede einzel vo ehne hed en Powerpoint gmacht met Belder vo ehne ond es paar Redene hend mösse vorbereitet wärde. Am Mettwoch Obe eschs Awards Banquet gseh. Alli gwonnene Prise ond Zertifikat send usghändet worde e jedere Kategorie. Zerscht esch de Akademisch Part dra cho wie BPA,FFA,Science Fair,The play, ond Musig. E Bpa hani mini 1. Platz State Trophäe zrog becho ond es Zertifikate dasi em Theater mergmacht gha han.

Em Sport Teil hani es Zertifikat becho als Metgled em Varsity Volleyball Team ond no e Pin wo mer a nes W cha stecke. Das W stohd för Winifred High School ond mer chönntis a ne Jagge näie ond de all dini Pins dra tue.

Wie emmer noch dem hends weder Ässe gä ond mer hend eifach chli plauderet. 

D Belder send vo de Torch Ceremony. Mer hends das för Bpa gmacht, well sie die neue Officer förs nöchschte Johr usgsuecht hend ond de hesch emmer no so e chlini Zeremonie wo du dis Amt witergesch. Bpa esch wörklech e mega gueti Erfahrig gseh ond ech wörds grad weder mache, aber denn wördi a National Wettbewerb go.

Am Samschtig denne esch d Graduation gseh. Zerscht semmer ed Community Hall gange zom d Seniors träffe ond eifach chli met allne Lüt zämme z hocke. Am 7 am Obe hed d Zeremonie agfange. Es esch ned wörklech sehr spannend gseh. D Redene send onentlech lang gseh ond ech be fascht igschlofe. D Senior Slideshows esch met abstand s beschte gseh ond de am schloss no allne go gratuliere. Wells natürlech ned so e grossi Schuel esch, esch das ganze ned so mega gross gse ond au d After Party hät chönne besser si. Aber e Polizescht esch en Town gseh ond esch omenand gfahre. Ech glaube er hed sogar es paar Autos usegno ond Kontroll gmacht. 

Ech meine för d Winifred Schüeler esch no zemlech emotional gseh, well die etz es College gönd ond mer si nömm so vell werd gseh, aber mer wärde jo eh scho baud go ond drom esches ned wörklech so schlemm gseh.

Ech realisieres ebe gar nonig das ech e 2 Woche scho weder deheime werde setze ond werd smile wie es chlises Chend, well ech mini Familie weder om mech ome ha.

Ah ond jo e 6 Täg gseh ech mini Eltere weder. How cool is that?!!! Be wörklech mega gspannt sie a nes Branding z brenge.. Fotos werden folgen ;)

What a great Day - Table Branding at George's

D Sue ond de George Fischer send zwee äuteri Iwohner vo Winifred wo eifach u lieb send ond mer so onglaublech as Härz gwachse send. Ech chönnt wörklech säge sie send mini amerikanische Grossäutere. Emmer wenn d Sue d Bodi ond mech gsed chond sie öbbere ond ged eus zerscht mou e riese Omarmig. Mer seged eri lieblings Teenager.
Legscht Woche hed sie eus iglade mer chöige ehne go höufe Brande. Sie möcheds aber met em Table anschtatt wrestling. Be Table Brands dosch du d Chäuber dör e Gan stöicke ond de wördeds enes ängs Getter quetscht das si sech nömme chönd bewege. Natürlech esch das nome haub so vell Spass, aber mer hend glich öbbis z tue gha. D Fischers hend nomme 35 Chäuber gha drom heds au ned velli Häufer brucht gha. Euse Job esch gseh d Chäuber dör dä Gang z pushe was wörklech no zemlech scary esch, well du mosch genau hender ehne si ond si met dim Chnüü vorwärts dröcke. Ond es paar Chäuber send gross ond die probiered z kicke. Natürlech hends mech sehr guet verwötscht ond ech ha weder 2 schöni blaui Fläcke zue verdient.
S legschte Chaub hend d Bodi ond ech no döffe wrestle ond denne hebe wie mers normal möched. Das esch super gsi. Nochhere hemmer de George gfrogt öb mer met de Four Wheelers döffe chli go omefahre. Er hed eus schnll igwese wo mer döffe dörefahre ond wo ned ond de semmer scho gfahre. Natürlech jedi vo eus met emene eigete. Mer send of sim Land omegfahre. Er glaubed gar ned wie wonderschön die ganz Natur esch. Eifach nome Landschaft ond nergendwo Hüser. Mer hend sogar no en Antilope of eusem Wäg atroffe.
Z Znacht vo d Sue för eis zuebereitet hed esch köschtlech gseh!! Indian Tacos ond e bärg selbergmachti Glace zom Dessert.
Sie hend mega chlini Baby Chätzlis gha wo mer hend döffe hebe ond kuschle ond spele. Natürlech hed mer eus dete fascht nömme wägbrocht. Ond mer send erscht om di 9i langsam hei. De George ond d Sue hend eus no iglade nöchscht Woche e chline Usflog z mache ond e erem Wohnwage öbernachte! Ech freu mech etz scho mega!!!

Superintendent

Als hät echs ned öbbe gseh cho. Mine ehemalig Gaschtvater esch vo sim Job als Schuel Rektor suspendiert worde. Eifach niemer hed ehn je mous gärn gha ond etz heds em School Board eifach mou glängend. Am legschte Fritig heder mösse d Schlössu abgä. Wies genau witer god weiss ech eigendlech au ned so gnau. Ech hoffe das si ne nöchscht Johr ned nomou istelled, aber wenn ech ehn wär wörd ech gar ned zrog cho, wenn mer doch genau weiss das niemer ehn schätzt. Ond vorallem e somene chline Dorf wie Winifred. Ech denke wenn er entloh werd wärde sie wägzieh, well er läbt emene Huus vo de Schuel ond det mössti er de use.
Zom Glöck han ech vor 7 Mönet mech gmäldet ond gseid ech möchti gärn d Gaschtfamilie wächsle. Das wär de e blödi Situation för mech gseh. Mis Buchgfühl hed mech e di rechtig Rechtig gfüehrt ond ech be absolut happy met minere Entscheidig.
Etz beni gspannt wie die ganz Gschecht no verlaufe werd.

De Sommer chond

Die Woche heda wörklech agfange warm z wärde. Plötzlech hend alli Shorts a ond d Luune esch so vell besser. 2 Mou e de Woche e de legschte Schuel Stond hemmer d Chance use z go ond Föteli mache. Meischtens legge mer nome em Gras ond sönneled. D Zit esch etz so schnell omegange ond ech chas gar ned glaube das ech mini Eltere scho e 3WOCHE werde gseh!!!

Onglaublech das mis Ustuschjohr scho fascht fertig esch ond d Schwiz mech weder am Haus hed.. Jäno Pech gehabt. Ech be so dankbar das ech das alles ha döffe erläbe.. Ond ech werde vorallem mini beschte Kollege d Ustuschschüelere enorm vermesse. Aber zom Glöck goni dä Sommer scho of Denmark ond cha sie weder ed Arme schliesse!

Hurra alles esch so super!!

Boyce's Branding

Scho mis 4. Branding hani meterläbt. Etz weissi emu wasi moss mache ond has scho zemlech onder Kontrolle. Klar mängisch geds ganz weldi Cheibe ond de bruechts mängisch chli extra Höuf oder ech moss of die Chäuber ufehöpfe ond si wörklech go wrestle. Es esch ebbe scho herti Arbet. Ond das hani au wörklech a mine Bei agseh nochethär. Ech ha jo wörklech ned gwösst wie fescht ech blaui Fläcke bechome, aber das esch eidütig ned normal... So gross ond blau. Zom Glöck send die meischte etz metti Woche scho weder verschwonde. Aber die grosse send no guet sechtbar. 

Das Branding am legschte Sonntig esch super guet gseh. Sogar d Bodi esch dete gseh ond hed ganzi 5 chlini Chäubli chönne wrestle.

A dem Tag hani jo wohl de gröscht Schock vo mim Läbe gha. Mer send grad met allne Chäuber fertig gseh wone ech mer en Drenk gönnt ha. Ech be zwöschemene Auto ond em Zuun gstande do fönd plötzlech mega vell afo schreie ond es Auto sprenge. Ech has doch zerscht ned tschegged was abgod, aber wo ech die weldi gross usgwachsnigi Chueh grad of mech zue z seckle chond hani nome no eis gwösst. SPRENG STEF SPRENG! Sie hend versuecht mech es auto z zieh aber das esch de scho z spot gseh. Gueter Glöck hanis no rechtzitig wäggschafft. Die Muetter Chueh esch nämlech schön verrockt gseh.

Nochemen chline Herzenfakt semmer gmüetlech go Znacht nä verosse, wells de ganzi Tag scho so schön Wätter gseh esch. Emmer e gueti Sach zom de Tag perkeft abschliesse.

Resultat: