Grad aschliessend vo Bozeman semmer of Harlow gfahre ond dete e Schuelbus omgstege ond ab nach Billings, well mer hend a dem Sonntig scho Competitions gha. Es hed öber 70 verschednegi Sache wo mer sech hed chönne qualifiziere a de Regionals en Great Falls bem legschte mou.
Jede Teilnähmer wos bes zom State gschafft hed cha nome a de Kategorie teilnäh wo mer sech qualifizert hed ossert a de Open Teschts. Die cha mer eifach go mache, aber d Chance esch eifach chliner das mer öbbis wörd gwönne, wells eifach so vell möched.
Mini wechtig Kategorie esch Advanced Dektop Publishing ond för das hani au amigs e de Schuel vell glehrt. Ech ha emmer so as Spass gseid gha das ech secher alli Amerikaner werd schlo ond State Champion wärde..
So jo am Sonntig send all die Teschts gseh ond am obe hemmer die erscht Session gha. Dete send alli Chapters vom ganze Staat gseh. Es esch wörklech impressiv gseh! Om die 1200 Students vo ganz Montana e eim Ruum versammlet. Ond wörklech die send vo öberall här cho. Do chonds ebbe ned drofa wie gross d Schuele send alli möched bem gliche met.
So adere Session esch eus alles erklärt worde ond en Sprächer esch dete gseh. Er hed usgseh wie de Forrest Gump ond arbeitet tatsächlech för d Reschtorant Chätti ond representiert de Forrest Gump. Er hed eus klar gmacht wie wechtigs eschs Möglechkeite wo eifach so uftauched z packe ond z nötze. S esch guet gseh aber eifach z lang, well mer so müed gseh send noch dem lange Tag.
De Mäntig hemmer chönnd nötze för s shoppe! D Bodi god äbbe scho e 2 Woche zomene Prom en Lewistown met emene Ustuschschüeler dete ond drom hemmer för sie es Prom Dress usegsuecht.
Ech ha no es Chleid brucht för d Award Zeremonie am nöchschte Morge. Mer daf ned of d Bühni go de Pris abhole (wenn mer öberhaupt eine bechond) wenn mer ned professionel agleit gseh esch. So wie emmer god Zit bem shoppe mega super schnell ome ond de semmer es Outback es Steak Reschtorant go es feins Znacht nä!
Mer hends eus so rechtig lo guet lo, glaubed mer.
Aber dä Tag esch nonig verbi gseh. Mänitg Obe esch de BPA Dance gseh! En Disco.. aber alli hend mösse es Shirt a ha wo mer dete becho hend. Es esch ned s schönschte gseh, ond jede hed glich usgseh, aber das hed eim erspart es schöns Outfit usezsueche. Ech ha mech so gfreut entlech weder mou chönne z tanze ond chli Party mache!!! E cheibe Spass hemmer gha.. Leider esches scho am 11 verbi gseh!
Do mossi etz ehrlech zuegä ech be zemlech nervös gseh wo d Award Presentation begonne hed. Em tüfschte Ennere hani mer ebbe scho gwönscht öbbis z gwönne. Das wär so super en Pokal oder wenigschtens e Rangierig z ha.
Er mönd wösse sie hend en Powerpoint gmacht ond dete send emmer die 10 beschte erschene enere random aordnig ond die hend de före chönne ond de esch abegläse worde vom 10 besch zom erscht Platz. Die send de of d Bühni ere Pris go abhole.
Well es so velli Kategorie gä hed hani mega lang möss warte bes mini dra cho esch ond befor dem esch no d Randi Wichman ond Hope Berg zwe gueti Kollegine ERSCHT ond ZWÖIT worde!! Mönd euch das vorstelle.. Das esch vom ganze Staat. Emmer nervöser ond nervöser ben worde ond de chon mini Kategorie!!!! Ond wär stohd of de Presentation.. Ech d Stefanie Spanier... Has ned chönne glaube.. Das hed mi no nervöser gmacht wenni so dete voregstande ben met anderne!
Agfange Näme abesäge verlönd mech emmer meh Lüüt ond de stohni dete elleige ond realisiere..
ECH BE STATE CHAMPIOOOOOON!!!!!!!
Was för es super guets Gfühl ech doch dete gha ha. Ech as an Foreigner ha d Amerikaner ed Chnü zwonge ond dä Pokal ghout! Mou do beni grad chli Stouz gseh.. Ech ha mech somet för d Nationals en Florida qualifiziert!!! Was jo nomou geiler wäri, aber wägem finanzielle gömmer leider ned.. Aber nome scho de Gedanke ech chönnt go aträte gäge Lüt vom ganze Land. Das esch eifach nome grossartig!!
So hani metemene super guete Gwösse chönne ed Trainer Hose schlöpfe ond mech of d Heifahrt begä. Bem Heifahre semmer nomou super guet go Ässe ond total kabott nochere igschlofe em Bus.
Das Wochenänd esch eifach nome super genial gseh!!!!
Keine Kommentare:
Kommentar veröffentlichen