So hemmer am Mettwoch scho am 1 us becho ond de hemmer eifach di frei Zit gnosse ond ech be no en Termin go mache för Nägu lo mache.
Am Donnschtig esch es de sowit gseh ond Thanksgiving esch for de Töre gseh.
Erwartet hemmer so om die 30 Gäscht e eusem Huus! Er mönd äbbe wösse das mine Gaschtvater e riese Familie hed. Er hed so om di 9 Gschwöschteti.
Aber befor die itroffe send hed mech öbber ander öberrascht ond zwar esches d Mina gseh. Sie esch mer ehre frösch gschossne Bock cho zeige.
Nochher send noch ond noch d Lüüt itroffe ond mer cha sech jo vorstelle wie verwerrt ech gseh ben met all denne vellne Lüt. Ech has super guet gha met de Tante vom Gaschtvater. Sie esch 86, aber emmer no cheibe fit. Ond sie hed mech welle abfölle met Wiis Wii.
Etz möchti si de mou bsueche noch de Schuel ond ehre chli Gsellschaft leischte, well ere Ma esch for paar Mönet verstorbe.
So heds mega vell verschednigs Ässe gä, well öbbe jede öbbis metgno hed. Nochem Ässe hemmer Domino gspelt ond emfau das cha echt no loschtig si. Ond logischerwis esch de ganz Tag Football em Fernseh gloffe.
Mine Gaschtvater ond ech hends eifach super moss mer no erwähne. Er esch chli en ältere, gmüetleche Cheib ond mer cha ehn eifach nome gärn ha. Wege ehm ha ech tatsächlech Sellerie met Erdnossbotter probiert. Wördi emfau ned empfähle! De Sellerie esch de grusig Part. De hani eifach d Erdnossbutter usegässe. Aber er hed gseid etz chöig ech eifach ned go schlofe, well ech min Sellerie ned z Änd gässe han. Oder är ond ech lueged ame so typischi Amerikanischi Spelshows ond jede vo eus nemmt e Groppe ond de semmer so zsäge gägenand. Esch eifach loschtig met ehm. Nor so näbebi mou welle chli verzelle vo ehm.
So esch e brutau lange Tag worde drom beni chli ofem Sofa go schlöfele. Aber de hed d Bodil mer aglütet ond metteilt, dass mer am 5 am Morge rechtig Billings fahred, well Black Friday esch. Das sovell bedütet wie jede Lade hed spezielli Agebot ond mega vell esch abegschrebe.
De beni aso schnell es Bett.
Black Friday
Jo am 5 am morge hemmer eus ofe Wäg gmacht. Aber das esch eigendlech scho fascht z spot, well d Läde möched scho am 3 am Morge uf ond denne send wörklech di mega bellige Sache, wie en guete Fernseh för 100 Bugs oder eso. Aber mer send eigendlech jo ned so of das us gseh.
So semmer am 8 e de Mall gseh ond hend afo ichaufe. Ond es hed wörklech gueti Agebot gha.
Loschtigerwis hani au no di Dütsch us Melstone atroffe, aber sie hed de au scho weder witer mösse.
Sie hed eifach no gseid, dass si wahrschindlech eri Familie au wöig wächsle.
Sie sett am beschte zo mer cho!
Jo de hemmer haut de ganz Tag schön gshopped ond nochhere no öbbis Mexikanisches go ässe.
Ah jo ech ha no mis Promchleid bstellt. Ech weiss das ech früeh dra be, aber ech be gärn vorbereitet. Drom hani au etz scho zemlech alli Wiehnachtsgschänk parat!
Jo ond das wär eigendlech au scho weder chli mini Erlänbnis do gseh. Ond emene Monet esch scho Wiehnachte. Ech cha gar ned glaube wie schnell das d Zit vergod. Etz beni au scho knapp 4 Mönet wäg vo deheime. God rasendschnell!
Danke a di Lüt wo töchtig min Blog läsed.
Keine Kommentare:
Kommentar veröffentlichen