Päcklis ond bescht Speler vom Staat

Woni heicho ben esch of de Stäge zo mim Zemmer das super Päckli gläge.

Es riese dankeschön ad Familie Walliser. Ech ha mech wörklech fescht gfreut. Päckli z becho ghört eigendlech scho zo eim vo mine gröschte Hobbies mossi säge. Drom freui mi emmer bsonders wenn weder öbbis en Winifred itrefft.

Fendes jo super das er mer alli Süesses schecked, aber glaubed mer so es Zwiback oder eso wörds au mou tue. :)

Ond etz chond jo di kulschti Nochrecht. Ha selber mega mega freud gha wonis ghört han.
Er mönd de onti stehendi Lenk go aluege noch dem er di folgende Zeile gläse hend. Hoffentlech fonktioniert..
En Speler us eusem Roy-Winifred Outlaws Team. Chad Kananen werd das Johr zemlech secher uszeichnet för de "BESCHT SPELER VOM GANZE STAAT MONTANA". Noch 10 Johr chond die Uszeichnig weder en Speler öbber vo de Klass C. Was meint vonere zemlech chline Schuel. Mer send so stouz of ehn. Ha scho emmer gseh das er wörklech mega talentier esch!
Wenn er spellt hed er eifach so vell Kontroll öber de Ball.. Spöut scho fascht wie en Schwarze.
Ond em Link setti de Video Bitrag vo geschter Obe si. Bes etz hend eusi Jungs no kes Spel verlore, denn ned nor är au di andere send pretty amazing Players.

http://www.krtv.com/videoplayer/?video_id=19726&categories=19

Dies und Das

Hallo meine Freunde in der Schweiz
Weder en witeri Woche e mim Ustuschjohr esch verbi grauscht wie em Flog,
Es god langsam wörklech vell vell z schnell.. Es god nöcher zue zo Hawaii ond ech freue mech wörklech fescht druf. Entlech weder mou Lüt z gseh wo mer scho länger könnt ond wo au dini Landessproch spräched. För die wos nonig wössed.. Ech treffe en Hawaii zwöi Frönde vo deheime. D Anja Kolar ond de Lukas Heller ond no es paar woni em Camp en New York könneglehrt gha han.
Das werd en onvergässlechi Woche.. Entlech mou us dem chline dorf use.

Wie öbbe jede Sonntig doni eifach mega vell mou nochenand skype ond ässe ond omehänge.
Eigendlech machi nie grosses a Sonntige.

Basketball Saison esch vou em Gang ond jedi Woche send so 2-3 Speli.

Well sie em ganze 4 Mannschafte hend dured das ganze emmer so mega lang. Da alli 3 Ustuschschüellerinne Manager send möm mer au emmer debi si so nemmt Basketball momentan e grosse Teil vo de Freizeit i. 

Aber well söscht jo au ned so vell chasch mache chond das eus ganz rächt!

Bodi ond ech hend es chlises Fotoshooting gha..

En Montana esches brutal chaut grad! ab etze eschs emer om di -20 grad Celsius.

Brr.. -20 Grad Celsius

RAGUSA!

Bodi hed mer mini Hoor gmacht

Nöchscht Wochenänd god s ganze BPA Team of Great Falls a Wettkämpf.

Mer wärde am Sonntig abfahre, dass mer euse schlof hend, well d Wettkämpf am Mäntig Morge früeh afönd. Ha gseh das mer no ergendwo emene Pool chönd go schwemme.. Wahrschindlech em hotel mou luege. Freu mech mou us Winifred use chönne z go.

Em BPA lersch eigendlech chli alles öber Wertschaft ond wählsch e paar Sache us wo du a verschednegie Teschts gosch... Je noch dem öb du guet besch oder ned chasch ad State Competition of Billings ond en Award gwönne.

Das send mini Kategorie woni teschtet werde.

Ice Fishing

S erscht mol em Läbe han ech gfeschet. Hät das mou je öbber denkt das ech gang go fesche..

Eigendlech hend d Mina ond ech höt morge öberhaupt ned gwösst öb mer öberhaupt usem Bett usewend, aber de hemmer eus ufgrafft, send go feini Waffle ässe ond Kaffi trenke ond de hed au scho d Lorna (Freds Gaschtmami) hed aglüte das si am 1 wörde los go fesche..

Ond au no de Mina ere Gaschtvater hed eus e schopf gä. Well es wördi sech wörklech lohne ond mer sette onbedengt go. Ond es esch wörklech de oberhammer worde..

Mer hend chli ossedra vo dem chline Seeli ghaute ond hend d Löcher em Is gmacht.

Ech ha so vell Spass gha ond ha em ganze 3 fesch gfange! Ech ha das nonie gmacht ond ha am meischte gha. Do beni aso scho grad chli stouz gsi. D Mina hed 2 gfange, ond de Jorden eine.. De Fred hed sine weder frei gloh ond de Simon dä arm Cheib hed eifach nüd gfange.

De Simon ganz lengs trurig well er nüd gfange hed, ech met mine 3 gfange Fesch, d Mina, de Jorden am de Fesch ässe ond de Fred schön voredra am posiere.

Wells mega chaut worde esch dör de Wend hemmer noch guet 6 gfange Fesch schloss gmacht ond eus ofe heiwäg begä.

D Mina hed mer denne be ere deheime zeigt wie mer en Fesch dot ufschnide ond d Enereie usenäh.

Es esch betzli grusig gsi, aber ha mi zemlech schnell as Bluet ond Eingeweide gwöhnt :)

Mer wärded de Fesch no einisch die Woche ässe.

Ah öbrigens d Arte vo de Fesch send: Rainbow Trout and Canaloupe.. Vo jedere Sorte hemmer 3 Stöck gha.

Chrank

Schuel wörd jo weder afo..
Aber mer gods grad ned eso guet ond drom blibi deheime. Ech be komischerwis geschter Obe chrank worde ond ha mösse e de Nacht erbräche. Jetzt leggi voukomme met dem Chräft am endi em Bett.. Ha ebbe söscht scho en Wenter Depression, well eifach ned vell grosses chasch mache ond jede Tag chli glich ablauft.
Ech frog mech eifach was mech chrank gmacht hed..

Silväschter mou anderscht

Well mer zwee eus scho denkt hend das Selväschter e ned speziell esch done hem mer zwee haut euse eigete Spass gha ond hend eri neu Feschauglense usprobiert. Das macht no zemlech super kuli Belder.

Sogar dosse semmer de Mond go fötele ond chli go omelaufe befor mer de zom Jorden gange send.

Cha scho mou säge das es ganz anderscht esch aus deheime.

Kei schön Chleider wärde agleit, gässe hani Pizza zom Znacht, ond vo Führwärk hani scho grad gar nüd meterläbt.

Wenni ganz ehrlech ben.. Mech hed de Neujohrsafang ned speziell donkt donkt done... Wörklech schad das mer genau nome em Basement vom Jorden ghocket hend.. Chli Felm gluegt, es Speli gspellt ond de schnell em Fernseh de Ball Drop en NY gluegt.

Alles e allem zemlech en Selväschter Reinfall, wenn echs met de heims vergliche wos wörklii mega kuul esch.

Do heds ned gross öber entressiert öbs etz es neus Johr gstartet hed oder ned. Aber jo esch glich no e wetzige Obe worde. 

Es esch no en Ustuschschüeler vo legscht Johr done gseh. Er esch zrogcho vo Schwede om Winifredt z bsueche...

Kalispell

Andere andere zwee Täg hends met mer au no züg onterno.
Do chond de no d Tochter vom Dennis dezue. D Nicole. Sie esch e de 4. Oberstufe ond wörklech e mega nätti. Sie hed vou d Lischte gmacht was si met mer chöiged go mache..
Mer send es Kino gange go "The Guilt Trip" go luege. Ech ha tatsächlech mou weder es grosses Kino vo nöchem gseh wo om di 12 Felme uffüehrt.
Was ech super fende a de amerikanische Kinos: Die hend ke Pause, ke feschti Setzplätz, ond de Pris esch öbbe d Höufti. Chönnti mi glatt dra gwöhne.

Jo go shoppe semmer au!

Ech ha secher scho meh als e Monet ke Mall me vo ehne gseh. Drom ha ech mech wi es chlises Chend druf gfreut gha. Vell hani de aber ned kauft.. Ech bevorzoge emfau Internet Shopping scho fascht besser.. Well dete fendsch öbbe alles was dis Herz begehrt.

Aber natürlech fäuht mers shoppe scho ame chli en Winifred.

Wo mer e de Mall fertig gseh send, semmer of d Idee cho mer chönntet jo hei go es Dessert mache.

So semmer alli Zuetat go boschtet ond heigfahre. D Nicole esch gfahre ond sie esch em alter vo minere Schwöschter.

Jo das wörd mer angscht mache, wenn mini chli Schwöschter wörd mech e de Gägend omefahre..

Sorry Vanessa nome e chline Wetz.

Mer hend Oreo Truffes ond Pfeffermönzschoggitäfelis welle mache.

D Oreo Truffes send eigendlech ofe erscht Schlag zemlech guet usecho aber met de Schoggi schmöuze hemmer so eusi Problem gha.

Zom gueter Glöck hed d Nicole no en äutere Stiefbrüeder. Er esch so om di 26 ond heds de hebrocht eus die Schoggi schmöuze.

Er heds gfühl gha ech sett doch das chönne. Alli Schwizer seged doch guet em Schoggi mache...na klar doch hani mer nome dänkt ond gschmonzlet.

Oreo Truffes

Peppermint Chocolate

Trip to Kalispell and White Fish

Do hed mech de Richard jo tatsächlech metgno of en Trip e osserscht Egge vo Montana. Ond ech meine wörklech osserscht Egge, well mer om di 7h Fahrtzit bruchet hend för nome ei wäg.
D jolene ond de jeff hend de naütlech ned döffe fähle ond so semmer am legschte Donnschtig am 8.00 am morge losgfahre. Ha mi wonderbar met Dechi, Chössi, Ipod, Buech ond Setzheizig beschattet ond so hed die Reis för mech chönne starte.

Die ganz Fahrt hani eigendlech nome so haube gschloffe ond zo guet Musig glost. Einisch hemmer en Pause gmacht för os WC ond das mer hend chönne Snacks chaufe. Erstuhnlecherwis esch d Zit wörklech schnell gange ond de semmer au scho bem Hus vom Jeff and Richard sim Cousin Dennis Simac acho.

Die hend eus super empfange ond als erschts semmer grad mou e Berg ufe, ene Apres Ski Bar ähnlechs Restourant met Live Country Musig, Burgers zom ässe, ond veeeell Bier. Do ech jo en Manager ben han ech aber ken Tropfe tronke. Ech ha mech do meh a heissi Schoggi gwändet.

Well eri Tochter a dem Obe ned deheime gseh esch hend sie aber eri Nechte bettet met mer öbbis zmache, was natürlech ned nötig gseh wär. Ech has aber echt mega lieb gfonde.

Am nöchschte Morge eschs ab ond d Ski gange. Mer send 4 Teenager gseh ond send elleige metem Auto ofe Berg gfahre was öbbe 20 Minute brucht. Dalton de ältischt Sohn vo de Familie heds fahre öbberno.

Die hend dete obe es super System met Ski miete ond so esches wörklech zemmlech schnell gange ond de ha ech mine Tagespass ond Rossigniol Ski gha.

De natürlech grad ed Beiz öbbis go ässe. Mer send zwar grad vom Zmorge cho, aber es esch ned so sättigend gseh. Send au nome Doughnuts gsi. 

So hemmer wonderbar ned gsonds Ässe boschtete ond dete chli plöiderlet ond de weder ab of d Pischte.

Det hani de mösse Föteli mache met dene mega Bäum. Es esch eine vo de einizge Ort of de Welt wo si so usgsänd. Met all dere Chöuti ond em Wend..

Ech be wörklech e gueti Fahrerin deheime, aber do hani eifach wörklech Respekt gha vor de Pischtene woni nonie vorhäre befahre ha ond dene neue Ski wo mer eifach ned so passes. Aber das hed mech jo ned chönne dra hendere das mer mega vell Spass zämme gha hend.

(Ond die hend nome Sessulift gha! Das hani so super gfonde. Ech ha die Böguleft ebbe scho ned eso gärn.)

Ond so semmer so om die 3-4h omedüsed ond de hemmer zemlech chaut becho ond send weder heigfahre, aber vorhär hani no schnell mösse em Gift Shop mösse go ahalte..